(ខេត្តសៀមរាប) ៖ ក្រុមការងារជួសជុលប្រាសាទបុរាណខ្មែរកំពុងតែយកចិត្តទុកដាក់ក្នុងការជួសជុលប្រាសាទរបស់ខ្មែរយើងជាច្រើនក្នុងខេត្តសៀមរាប ក្នុងនោះផងដែរដំណើការនៃការជួសជុលប្រាសាទភ្នំបាខែង បានជួសជុលប្រាង្គឥដ្ឋលេខ១៣ ឬហៅថា G13 បានបញ្ចប់ការជួសជុលរួចហើយ ដែលចំណុចនោះគឺការពង្រឹងតួចខឿន និងផ្នែកជញ្ជាំងរបស់ប្រាសាទ។
យោងតាមកិច្ចសម្ភាសន៍ជាមួយលោកស្រី ឈុន រតនា មន្រ្តីនៃនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា បានថ្លែងឲ្យដឹងថា ប្រាង្គឥដ្ឋលេខ១៣ បានចាប់ផ្តើមជួសជុលនៅខែឧសភា ហើយគ្រោងបញ្ចប់នៅក្នុងខែវិច្ឆិកានេះ។ ការជួសជុលដំណាក់កាលទី១នេះ គឺចាប់ពីខឿនគ្រឹះឡើងលើប្រវែង៥ម៉ែត្រ។ អាជ្ញាធរជាតិអប្សរានឹងបន្តការងារជួសជុលដំណាក់កាលទី២ រហូតដល់កំពូលនៅដើមឆ្នាំក្រោយ។
លោកស្រីបានជម្រាបបន្ថែមជូនដល់អ្នកសារព័ត៌មានថា ស្ថានភាពមុនជួសជុល តួប្រាសាទឥដ្ឋនេះមានសភាពទ្រេត ឥដ្ឋពុកផុយ មានសត្វកណ្តៀរ និងរុក្ខជាតិតូចធំដុះ ធ្វើឱ្យប្រាសាទ ពិបាកឈរជាខ្លាំង ត្រូវការការទល់ទ្រជាចាំបាច់។ ចំណែកខឿនប្រាសាទវិញ ស្រុត និងបាត់ថ្មច្រើនដុំ។
សម្រាប់ការងារជួសជុលនេះដែរ ក្រុមការងារលោកស្រី ឈុត រតនា បានជួសជុលពង្រឹងខឿនជុំវិញប្រាសាទ ដោយខឿនខាងកើតប្រើថ្មបាយក្រៀមសុទ្ធ៦ស្រទាប់ និងកម្រាលថ្ម១ស្រទាប់។ ដោយឡែកខឿនខាងលិច ប្រើប្រាស់ថ្មភក់ ដោយសារវានៅសេសសល់ស្លាកស្នាមជាខឿនចំនួន១១ដុំ ហើយអ្នកជំនាញ បានស្វែងរកបំណែកថ្មភក់ដទៃទៀត ដែលនៅរាយប៉ាយជុំវិញបរិវេណប្រាសាទ។ អ្នកស្រី រតនា បញ្ជាក់ថា បំណែកខឿននៅជ្រុងខាងលិច ត្រូវបានក្រុមការងារស្វែងរកនៅខាងកើតប្រាសាទ ជិតបណ្ណាល័យ ខាងលិច សរុបជិត១០០ដុំ ដែលកន្លងមកក្រុមការងារអង្គការមូលនិធិប្រាសាទពិភពលោក (WMF) ប្រមូលទុកនៅមួយកន្លែង បន្ទាប់ពីមានការជួសជុលជុំវិញប្រាសាទនេះ។
« កត្តាដែលនាំឱ្យមានការបំលាស់ទីថ្មចេញពីបរិវេណខឿនប្រាសាទឥដ្ឋទី១៣ ព្រោះថានៅសម័យកណ្តាល មានការធ្វើព្រះដ៏ធំមួយនៅកំពូលប្រាសាទ ធ្វើឱ្យថ្មភក់បាត់នៅទីតាំងដើម ដូចករណីតួប្រាង្គឥដ្ឋលេខ ១៥ ជាដើម»។ នេះការលើកឡើងរបស់ជំនាញរូបនេះ ។
សម្រាប់ការងារជួសជុលជញ្ជាំងឥដ្ឋវិញ ក្រុមការងារបានគោរពទៅតាមធម្មនុញ្ញអង្គរ ដោយប្រើឥដ្ឋចាស់ក្នុងបរិមាណច្រើន និងថ្មីខ្លះ ក៏ដូចជាបិទបាយអរ ដើម្បីឱ្យរឹងមាំឡើងវិញ និងប្រើប្រាស់ឥដ្ឋដូចទំហំឥដ្ឋចាស់។ អ្នកស្រី រតនា បន្តពន្យល់ដូច្នេះថា៖« ការប្រើបាយអរ ប្រើដោយស្តង់ដា និងមានវាស់ថ្លឹងត្រឹមត្រូវ ដើម្បីការពារកុំឱ្យវាខាំជាប់មិនល្អ។ ជញ្ជាំងខាងក្នុងបានសម្អាត និងបិទបាយអរ ដកយកកណ្តៀរចេញ ការពារកុំឱ្យមានជម្រាបទឹក»។
សូមជម្រាបថា ប្រាង្គឥដ្ឋនៅជុំវិញប្រាសាទធំមានចំនួនសរុប ៤៤ ក្នុងនោះខូចខាតកម្រិតមធ្យម១៥ ខូចខាតធ្ងន់ធ្ងរចំនួន៧ និងនៅសល់ត្រឹមតួគ្រឹះចំនួន ១៨។ កន្លងមកអាជ្ញាធរជាតិអប្សរាបានជួសជុល ប្រាង្គលេខ១៥ ប្រាង្គលេខ១៤ និងប្រាង្គលេខ១៣នៅពេលនេះ៕
