(ភ្នំពេញ)៖ ក្នុងកិច្ចប្រជុំផ្សព្វផ្សាយពីស្ថានភាព និងកិច្ចខិតខំប្រឹងប្រែងរបស់រាជរដ្ឋាភិបាល ពាក់ព័ន្ធនឹងបញ្ហាព្រំដែនកម្ពុជាថៃ ក្រោមអធិបតីភាព ឯកឧត្តម ឧបនាយករដ្ឋមន្ដ្រី ហ៊ុន ម៉ានី បានលើកឡើងអំពីបញ្ហាមួយចំនួន និងដំណោះស្រាយរបស់រាជរដ្ឋាភិបាលកម្ពុជាក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ដ្រៃនៃកម្ពុជា គឺបង្ហាញនូវផលវិជ្ជមានជានិច្ច។
ឯកឧត្តម ហ៊ុន ម៉ានី ក្នុងកិច្ចប្រជុំនេះបានថ្លែងអំណរគុណយ៉ាងជ្រាលជ្រៅដល់សមាជិកសមាជិការដែលតែងតែយកចិត្តទុកដាក់ក្នុងការអនុវត្តកម្មវិធីនយោបាយរបស់រាជរដ្ឋាភិបាលកម្ពុជានាពេលបច្ចុប្បន្នប្រកបដោយប្រសិទ្ធភាពខ្ពស់ ជាពិសេសគោលដៅក្នុងការដឹកនាំ គ្រប់គ្រង និងអភិវឌ្ឍវិស័យមុខងារសាធារណៈ ការកែទម្រង់រដ្ឋាបាលសាធារណៈ។ ការប្រឹងប្រែងទាំងអស់គ្នា ដែលជាសមាជិកសមាជិការនាំឲ្យកម្ពុជាយើងមានដំណោះស្រាយប្រកបដោយសន្ដិភាពស្ដាប់តាមរដ្ឋាភិបាល នោះគ្មានឆាកប្រយុទ្ធដែលមានការស្លាប់ទាំងសងខាងនោះទេ។
ឧបនាយករដ្ឋមន្ដ្រីរូបនេះ បានថ្លែងបន្ថែមថា ស្ថានភាពនៃកិច្ចខិតខំប្រឹងប្រែងរបស់រាជរដ្ឋាភិបាលក្នុងការដោះស្រាយជម្លោះព្រំដែន កម្ពុជា-ថៃ ដោយបានឆ្លុះបញ្ចាំងពីការខិតខំប្រឹងប្រែងរបស់រាជរដ្ឋាភិបាលក្នុងការដោះស្រាយបញ្ហាផ្អែកលើមូលដ្ឋានការទូត ក៏ដូចជាច្បាប់អន្តរជាតិ ដូចប្រសាសន៍របស់សម្តេចធិបតីលើកឡើងថា «ស្ងប់ស្ងាត់ តែមិននៅស្ងៀម»។
ឯកឧត្តមបានលើកទឹកចិត្ត ឲ្យសមាជិក សមាជិកាគ្រប់រូបបន្តជឿជាក់លើថ្នាក់ដឹកនាំគណបក្សប្រជាជនកម្ពុជា ក្រោមការដឹកនាំរបស់ សម្តេចតេជោ។ សូមសមាជិកា សមាជិកា បន្តថែរក្សាស្មារតីស្នេហាជាតិ មោទនភាពជាតិ និងការគាំទ្ររាល់វិធានការណ៍របស់រាជរដ្ឋាភិបាលកម្ពុជាក្រោមការដឹកនាំរបស់ សម្ដេចមហាបវរធិបតី និងកម្លាំងជួរមុខកម្ពុជា ដែលពិតជាមានសមត្ថភាព និងមានទំនួលខុសត្រូវខ្ពស់ក្នុងការដោះស្រាយបញ្ហាព្រំដែនកម្ពុជា-ថៃ ឈានទៅកាន់ប្រក្រតីភាព និងនាំមកនូវសន្តិភាពពេញលេញ៕
