(ខេត្តស្វាយរៀង) ៖ កម្លាំងសមត្ថកិច្ចនៃព្រះរាជាណាចក្រកម្ពុជាបានចុះបង្ក្រាបករណី Online Scams ខ្នាតធំដោយបានឃាត់ខ្លួនជនសង្ស័យបានចំនួនជាង៦០០នាក់ កាលពីថ្ងៃទី០៤ ខែវិច្ឆិកា ឆ្នាំ២០២៥ ស្ថិតនៅត្រង់ចំណុចផ្លូវបេតុង ភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
ជាលទ្ធផលរកឃើញជនសង្ស័យសរុបចំនួន៥៧នាក់ ក្នុងនោះខ្មែរ១២នាក់ ដែលជាអ្នកអនាម័យ សន្តិសុខ និងបកប្រែ។ ក្រៅពីនេះ ជាជនបរទេស មានទាំងអស់៦សញ្ជាតិ។ ចំណែក ទីតាំងទីពីរ គឺអគារភ្លោះកម្ពស់៩ជាន់ ស្ថិតនៅលើផ្លូវកំពង់ស្ពាន ភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។ ជាលទ្ធផល រកឃើញជនសង្ស័យ៦០១នាក់។ ពួកគេជាជនបរទេស មានទាំងអស់៤សញ្ជាតិ។
លោក ទូច សុឃៈ អះអាងថា៖ «ជនសង្ស័យខាងលើ ពាក់ព័ន្ធនឹងការប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។ កិច្ចការនេះ ក្រុមការងារនៃគណៈកម្មការចំពោះកិច្ច នៃក្រសួងមហាផ្ទៃ បានសហការជាមួយអគ្គស្នងការដ្ឋាននគរបាលជាតិ រួមជាមួយស្នងការដ្ឋាននគរបាលខេត្តស្វាយរៀង ក្រោមការសម្របសម្រួលនីតិវិធីពីព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង»។
លោក កែវ វណ្ណថន រដ្ឋលេខាធិការក្រសួងមហាផ្ទៃ និងជាអនុប្រធានគណៈកម្មការចំពោះកិច្ច ជាអ្នកដឹកនាំប្រតិបត្តិការ ហើយបានពិនិត្យវត្ថុតាង និងធ្វើកោសល្យវិច័យបឋម លើទីតាងទាំងពីរ។ ទីតាំងទីមួយ ក្រុមជំនាញ រកឃើញក្រុមជនសង្ស័យ ធ្វើសកម្មភាពឆបោកតាមរូបភាពក្លែងបន្លំជាសមត្ថកិច្ចដើម្បីគំរាមជនរងគ្រោះ។ ទីតាំងទីពីរ ឃើញក្រុមជនសង្ស័យ ធ្វើសកម្មភាពឆបោក ក្រោមរូបភាពវិនិយោគទទួលបានប្រាក់ចំណេញខ្ពស់ ការបង្កើតរូបភាពប្រតិបត្តិការធនាគារក្លែងក្លាយ ការបង្កើតទំនាក់ទំនងក្រោមរូបភាពស្នេហា ការចុះឈ្មោះរត់កីឡាម៉ារ៉ាតុងក្លែងក្លាយ និងការប្រើប្រាស់បច្ចេកវិទ្យា Ai Deep Fake ដើម្បីក្លែងវីដេអូនិងរូបភាពសម្រាប់ក្លែងអត្តសញ្ញាណ។
លោក ទូច សុឃៈ វាយតម្លៃប្រតិបត្តិការខាងលើ ជាទឡ្ហីករណ៍ថ្មីមួយទៀត បញ្ជាក់ពីឆន្ទៈពិតប្រាកដ និងកិច្ចខិតខំប្រឹងប្រែងប្រកបដោយភាពប្រាកដនិយមរបស់កម្ពុជា ដើម្បីរួមចំណែកដោះស្រាយបញ្ហាប្រឈមជាសកល។ ជាក់ស្ដែង កម្ពុជាបានបណ្ដេញជនបរទេស១៥០០០នាក់ ពាក់ព័ន្ធនឹងបទល្មើសឆបោកអនឡាញ ក្នុងរយៈពេលជាង២ឆ្នាំ នៃរាជរដ្ឋាភិបាលអាណត្តិទី៧៕
