ក្រសួងព័ត៌មានបើកកិច្ចប្រជុំ​ត្រៀម​រៀបចំ​សន្និបាត​ប្រចាំឆ្នាំ២០២៥ និង​លើកទិសដៅ​បន្ដឆ្នាំ២០២៦

(ភ្នំពេញ)៖ នៅរសៀលថ្ងៃទី​១៤ ខែមករា ឆ្នាំ២០២៦ ក្រសួងព័ត៌មាន​បើកកិច្ចប្រជុំ​ត្រៀមរៀបចំ​សន្និបាត​ប្រចាំឆ្នាំ២០២៥ និង​លើទិសដៅ​បន្ដឆ្នាំ២០២៦ ក្រោមអធិបតីភាព​ដ៏ខ្ពង់ខ្ពស់​របស់​ ឯកឧត្តម នេត្រ ភក្រ្ដា រដ្ឋមន្ដ្រីក្រសួងព័ត៌មាន ដែលមានការអញ្ជើញ​ចូលរួមពីសំណាក់​រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយិការ ប្រធាន​នាយកដ្ឋាន និង​ការិយាល័យ​ដែលមានការពាក់ព័ន្ធ។

តាមការឲ្យដឹងនៃសន្និបាត​របស់ក្រសួងព័ត៌មាននឹងប្រព្រឹត្តទៅក្នុង​រយៈពេល៣ថ្ងៃ ដោយគិត​ចាប់ពីថ្ងៃទី​១៩ ដល់ថ្ងៃទី​២១ ខែមករា ឆ្នាំ២០២៦ ខាងមុខនេះ​តែម្ដង​។ បើតាម​រដ្ឋមន្ដ្រី​ក្រសួងព័ត៌មាន ឯកឧត្តម នេត្រ ភក្ដ្រា បាន​បញ្ជាក់ថា ក្រសួងព័ត៌មាន នឹងត្រៀមរៀបចំសន្និបាតបូកសរុបការងាររបស់ខ្លួនដែលបានខិតខំបំពេញក្នុងរយៈពេលពេញ ១ឆ្នាំ២០២៥នេះ ហើយលើកទិសដៅអនុវត្តន៍បន្តនៅឆ្នាំ២០២៦។ ការរៀបចំសន្និបាតបូកសរុបលទ្ធផលការងាររបស់ក្រសួងព័ត៌មាន គឺដើម្បីពិនិត្យ និងវាយតម្លៃលើសមិទ្ធផលនានា ដែលសម្រេចបាននាពេលកន្លងមក និងចូលរួមពិភាក្សាផ្លាស់ប្តូរយោបល់ និងចែករំលែកបទពិសោធល្អៗ ក្នុងរិះរកដំណោះស្រាយសមស្រប ចំពោះបញ្ហាប្រឈមនានា ហើយដាក់ចេញនូវទិសដៅការងារសម្រាប់ការអនុវត្តបន្តសំដៅលើកកម្ពស់វិស័យព័ត៌មាន និងសោតទស្សន៍នៅកម្ពុជា ឱ្យកាន់តែប្រសើរឡើងថែមទៀតក្នុងឧត្តមប្រយោជន៍ជាតិ និងប្រជាជនកម្ពុជា។ សន្និបាតបូកសរុបលទ្ធផលការងាររបស់ក្រសួងព័ត៌មាន ធ្វើឡើងដើម្បីចូលរួមក្នុងគោលនយោបាយកំណែទម្រង់សុីជម្រៅនៃយុទ្ធសាស្រ្តបញ្ចកោណ ដំណាក់កាលទី១ អាណត្តិទី៧ របស់រាជរដ្ឋាភិបាលកម្ពុជា។

គួរបញ្ជាក់ដែរថា នៅក្នុងអាណត្តិទី៧ របស់រាជរដ្ឋាភិបាលកម្ពុជា ក្រោមការដឹកនាំរបស់ សម្តេចបវរធិបតី នាយកដ្ឋមន្ត្រី ហ៊ុន ម៉ាណែត, ក្រសួងព័ត៌មាន ដែលមានឯកឧត្តម​ នេត្រ ភក្ត្រា ជារដ្ឋមន្ត្រី បានដឹកនាំរៀបចំសន្និបាតបូកសរុបលទ្ធផលការងាររបស់ខ្លួនបានចំនួន ២លើករួចមកហើយ ដោយបានបង្ហាញពីសមិទ្ធផលថ្មីៗគួរជាទីមោទនៈ លើវិស័យព័ត៌មាន និងសោតទស្សន៍ នៅកម្ពុជា៕

ដោយ ៖ ទេព វីរៈ