(ភ្នំពេញ) ៖ ចោរឆក់ប៉ះចំថ្ងៃស៊យឆក់ខ្សែ.កចំនារីជើងខ្លាំង៣នាក់ ដែលជិះចំទិសដៅស្របគ្នា បានជិះដេញតាមរហូតវាយបណ្ដាលទ្រោមខ្លួន ហើយបានហៅប្រជាពលរដ្ឋមកជួយឃាត់បានសម្រេច ដែលហេតុការណ៍នេះបានកើតឡើងស្ថិតនៅវេលាម៉ោង ០៥៖៤០នាទី ល្ងាចថ្ងៃទី១៧ ខែកុម្ភៈ ឆ្នាំ២០២៦ ត្រង់ចំណុចភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ។
ចោរឆក់ទាំង២នាក់ខាងលើនោះ មិនទាន់ត្រូវបានស្គាល់អត្តសញ្ញាណនៅឡើយទេ ក្រោយពេលចាប់ខ្លួនបាន ប្រជាពលរដ្ឋ បានប្រគល់ចោរទាំង២នាក់នេះ ទៅឲ្យនគរបាលភ្លាមៗដែរ។ ដោយឡែកនារីរងគ្រោះ ក៏មិនត្រូវបានស្គាល់អត្តសញ្ញាណដែរ ហើយខ្សែករបស់នាង ដែលត្រូវចោរឆក់យកមិនបានសម្រេចនោះ ជាខ្សែកប្លាទីន ។
អ្នកភូមិខាងលើ បាននិយាយថា នៅមុនពេលកើតហេតុ ស្ត្រីរងគ្រោះមានគ្នា៣នាក់ បានជិះម៉ូតូ ១គ្រឿង ម៉ាក Honda PCX ពណ៍ស ឌុបគ្នាធ្វើដំណើរតាមផ្លូវបេតុងបុរីសែនមនោរម្យ ក្នុងទិសដៅ ពីត្បូងទៅជើង។ លុះពេលទៅដល់ត្រង់ចំណុចកើតហេតុ ស្រាប់តែមានចោរ២នាក់ ជិះមូតូ១គ្រឿង ម៉ាកហុងដាស្កូបពីពណ៌ក្រហម ពាក់ស្លាកលេខភ្នំពេញ1KG-2201 ក្នុងទិសដៅពីត្បូងទៅជើងស្របគ្នា ដេញតាមធ្វើសកម្មភាពឆក់ខ្សែកប្លាទីនពីនាង ។
អ្នកភូមិដដែល បាននិយាយបន្តថា ខណៈនោះឆក់ មិនបានសម្រេចឡើយ ដោយស្ត្រីរងគ្រោះ នាំគ្នាប្រតាយប្រតប់តបតវិញ បណ្ដាលឲ្យដួលម៉ូតូទាំងអស់គ្នា បន្ទាប់មកជនសង្ស័យបាននាំគ្នារត់គេចខ្លួនចោលម៉ូតូចូលទៅក្នុងបុរីសែនមនោរម្យ។ ប៉ុន្តែពេលនោះ នារីរងគ្រោះទាំង៣នាក់ បានស្រែកឆោឡោថា«ចោរៗ» បង្កឲ្យមានការភ្ញាក់ផ្អើលដល់អ្នកភូមិនាំគ្នាជួយដេញតាមឡោមព័ទ្ធចាប់ខ្លួនបានភ្លាមៗ ។ បន្ទាប់មក ក៏រាយការណ៍ប្រាប់នគរបាលប៉ុស្តិ៍កន្ទោក ឲ្យចុះទៅយកចោរ២នាក់នោះ ទៅសួរនាំដើម្បី កសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមច្បាប់ ៕
.jpg)
.jpg)
