(ភ្នំពេញ) ៖ ជារៀងរាល់ថ្ងៃអាជ្ញាធររាជធានីភ្នំពេញបានដាក់កម្លាំងនៅជុំវិញតំបន់ផ្សារដើមគដដែល ដូចជាមហាវិថីព្រះមេរ៉េត ម៉ៅសេទុងផ្លូវ២៣០ និងផ្លូវកាត់ទទឹងមួយចំនួនទៀតក្នុងខណ្ឌបឹងកេងកង និងខណ្ឌទួលគោក ហើយនាពេលយប់នៅតែបន្ដបិទដដែល ដោយសារតែមានអ្នកលក់បន្លែផ្លែឈើបោះដុំមួយចំនួនតូចបានបំពានបម្រាមរបស់សាលារាជធានីភ្នំពេញ នេះបើយោងតាមការបញ្ជាក់របស់លោកស្រី ដោ សម្ផស្ស អ្នកនាំពាក្យរបស់សាលារាជធានីភ្នំពេញ។
បើយោងតាមប្រភពព័ត៌មានពីលោកស្រី ដោ សម្ផស្ស បានប្រាប់ឲ្យដឹងថា ចាប់ពីវេលាម៉ោង១២យប់ដល់ម៉ោង៥ភ្លឺ មានអ្នកលួចយកចិញ្ចឹមផ្លូវសាធារណៈធ្វើសកម្មភាពបំពានបម្រាមរបស់សាលារាជធានីភ្នំពេញ ហើយអាជ្ញាធរក៏កំពុងតែឈជើងនៅតំបន់ផ្សារដើមគយាមកាមកុំឲ្យពួកគាត់លក់បន្ដទៀតដែរ។ សព្វថ្ងៃនេះ ពួកគាត់នៅតែបន្តលួចធ្វើសកម្មភាព ពិសេសនៅម៉ោង ១២ យប់ ម៉ោង ១ យប់ ម៉ោង ២ ឬ ៣ យប់ ម៉ោង ៥ ភ្លឺ ក៏មាន តែជាចំនួនតូចនោះទេ។ ពួកយើងនៅតែកំពុងតាមដាន»។
លោកស្រី ដោ សម្ផស្ស បន្តថា «ម្យ៉ាងវិញទៀត ចំពោះអាជីវករដែលលក់នៅក្នុងផ្ទះ ពួកគាត់សហការជាមួយយើង តែនៅពេលដែលពួកយើងចុះរៀបចំតែប៉ុណ្ណោះ តែនៅពេលយើងដកឃ្លា ពួកគាត់ បន្តលក់មកលើចិញ្ចើមផ្លូវដដែល ដែលសកម្មភាពនេះយើងនៅតែបន្តតាមដានអប់រំ ណែនាំជាមួយនឹងការធ្វើកំណត់ហេតុពួកគាត់ជារៀងរាល់យប់។ ចំពោះសកម្មភាពនេះ បន្តិចទៀតបងប្អូនយល់ ទើបយើងបន្ធូរបន្ថយរាប់ទាំងការបើកផ្លូវនៅពេលយប់ឡើងវិញផងដែរ ព្រោះពួកគាត់នៅតែបន្តលបលួចលក់ដូរនៅពីយប់ ពិសេសនៅពេលកណ្ដាលអធ្រាត្រ ដោយមកផ្ទេរផ្ទូរ សម្រុកចូលមកដល់គោលដៅដែលពួកគាត់ធ្លាប់លក់។ យើងនៅតែធ្វើការជាមួយពួកគាត់ ដោយយើងបានកំណត់មុខសញ្ញាពួកគាត់បាន និងបានបញ្ជូនគាត់ទៅលក់នៅទីតាំងដែលពួកគាត់ចង់ទៅលក់។ អ្វីដែលអាជ្ញាធរបានកំពុងធ្វើ គឺប្រើប្រាស់នូវវិធានការអប់រំណែនាំពួកគាត់។ តែបើសិនជាពួកគាត់នៅតែប្រឆាំងបម្រាមនេះ ម្ដង ពីរដង ឬបីដង យើងអាចនឹងមានវិធានការរដ្ឋបាលហើយ»។
លោកស្រី ដោ សម្ផស្ស បញ្ជាក់ថា ចំពោះអាជីវករមួយចំនួនធំកន្លងមកលក់ដូរនៅលើផ្លូវម៉ៅសេទុង មហាវិថីមុន្នីរ៉េតផ្លូវ ២៣០ និងតំបន់ផ្លូវមួយចំនួន ជុំវិញផ្សារដើមគ បានសម្រេចចិត្តទៅលក់នៅផ្សារដែលពួកគាត់ចង់ទៅលក់ហើយ ដូចជា នៅផ្សារដើមគរថ្មី ផ្សារតាម៉ាប់ព្រែកជ្រៃ និងផ្សារមួយចំនួនទៀត។
គួរបញ្ជាក់ផងដែរថា គិតមកដល់ពេលនេះមានរយៈពេល ២ សប្ដាហ៍ហើយ ដែលរដ្ឋបាលរាជធានីភ្នំពេញ បានដាក់បម្រាមមិនឲ្យអាជីវករលក់រំលោភលើទ្រូងផ្លូវ ចិញ្ចើមផ្លូវ នៅតំបន់ជុំវិញផ្សារដើមគ ក្រោមហេតុផលលើកសោភណភាពរាជធានី រៀបចំហេដ្ឋារចនាសម្ព័ន្ធ សណ្ដាប់ធ្នាប់ របៀបរៀបរយសាធារណៈ។ ចំណាត់ការនេះ ទទួលបានការគាំទ្រពីសំណាក់ប្រជាពលរដ្ឋយ៉ាងច្រើនលើសលប់។ ប្រជាពលរដ្ឋ ចង់ឃើញរដ្ឋបាលរាជធានីអនុវត្តវិធានការនេះឲ្យមានប្រសិទ្ធភាព៕
.jpg)
.jpg)
