(ខេត្ដព្រៃវែង) ៖ នៅខេត្តព្រៃវែងមានការរៀបចំយុទ្ធនាការ និយាយថាទេ ចំពោះព័ត៌មានក្លែងក្លាយ Say No to Fake News ដែលរៀបចំដោយមន្ទីរព័ត៌មានខេត្តព្រៃវែង នាថ្ងៃទី១១ ខែសីហា ឆ្នាំ២០២៥ ដែលមានការអញ្ជើញជាអធិបតីភាពដ៏ខ្ពង់ខ្ពស់ពី ឯកឧត្តម ម៉ែន សាម៉ន អនុរដ្ឋលេខាធិការក្រសួងព័ត៌មាន ទទួលបន្ទុកមន្ទីរព័ត៌មានខេត្តព្រៃវែង តំណាងឯកឧត្តម នេត្រ ភក្ដ្រា រដ្ឋមន្ដ្រីក្រសួងព័ត៌មាន និងឯកឧត្តម អន ភារៈ អភិបាលរងនៃគណៈអភិបាលខេត្តព្រៃវែង ព្រមទាំងមានការចូលរួមពីមន្ដ្រីរាជការនៃមន្ទីរអង្គភាពជុំវិញខេត្ត កងកម្លាំងប្រដាប់អាវុធ អភិបាលទាំង១៣ស្រុក រដ្ឋបាលឃុំសង្កាត់ មន្ដ្រីព័ត៌មាន អ្នកសារព័ត៌មាន និងយុវជន សរុបប្រមាណជាង៤០០នាក់។
លោក ញ៉ែម សៅគ្រី ប្រធានមន្ទីរព័ត៌មានខេត្តព្រៃវែង បានលើកឡើងថា យុទ្ធនាការ “និយាយថាទេចំពោះព័ត៌មានក្លែងក្លាយ សម្រាប់បញ្ជ្រាបការយល់ដឹង ឱ្យដល់ពលរដ្ឋក្នុងសហគមន៍មូលដ្ឋាន ដើម្បីចូលរួមប្រឆាំងព័ត៌មានក្លែងក្លាយ។ ក្នុងន័យនេះ មន្ទីរព័ត៌មានដើរតួនាទីស្នូលក្នុងការរៀបចំ និងសម្របសម្រួលការអនុវត្តជាមួយថ្នាក់ដឹកនាំ អាជ្ញាធរ និងអ្នកពាក់ព័ន្ធទាំងអស់ ដើម្បីធ្វើឱ្យយុទ្ធនាការនេះលេចចេញជារូបរាងឡើង។ លោក ប្រធានមន្ទីរព័ត៌មានបន្តថា យុទ្ធនាការនេះមានសារៈសំខាន់ ទាំងក្នុងក្របខណ្ឌនៃការប្រយុទ្ធប្រឆាំងព័ត៌មាននៅប្រទេសកម្ពុជា និង ក្នុងតំបន់។ យុទ្ធនាការនឹងប្រើវិធីសាស្ត្រ និងទម្រង់រៀបចំស្របតាមបរិបទនៃសង្គមឌីជីថល ក្នុងគោលដៅផ្លាស់ប្តូរឥរិយាបទរបស់ពលរដ្ឋដែលជាអ្នកប្រើប្រាស់បណ្តាញទំនាក់ទំនងសង្គម និងប្រព័ន្ធផ្សព្វផ្សាយ ទំនើប ក្នុងការទប់ស្កាត់ការរីកសាយភាយនូវព័ត៌មានក្លែងក្លាយ។
ឯកឧត្តម អន ភារៈ អភិបាលរងខេត្តព្រៃវែង មានប្រសាសន៍ថា យុទ្ធនាការ “និយាយថាទេចំពោះព័ត៌មានក្លែងក្លាយនេះផ្តល់ឱកាសនិងលើកទឹកចិត្តឱ្យតួអង្គពាក់ព័ន្ធទាំងអស់ក្នុងសង្គមចូលរួម ដើម្បីទទួលព័ត៌មាន ចំណេះដឹងបន្ថែមអំពីផលវិបាក និង គ្រោះថ្នាក់ ដែលព័ត៌មានក្លែងក្លាយបង្កឡើង។ យុទ្ធនាការនេះលើកកម្ពស់ការយល់ដឹងរបស់ប្រជាពលរដ្ឋ និងអ្នកផលិតមាតិកាលើបណ្តាញសង្គម អំពីការកំណត់អត្តសញ្ញាណព័ត៌មានក្លែងក្លាយ វិធានការទប់ស្កាត់ការរីកសាយភាយ និងបន្សាបព័ត៌មានក្លែងក្លាយ និងបំផុសឆន្ទៈចូលរួមតាមរយៈការអនុវត្តវិធានការបង្ការ និងសកម្មភាពនានាចាំបាច់ក្នុងការធានាសុវត្ថិភាពព័ត៌មានក្នុងសង្គម។
ឯកឧត្តមអភិបាលរងខេត្ត មានប្រសាសន៍បន្តថា ការបញ្ជ្រាបការយល់ដឹងឱ្យដល់ពលរដ្ឋក្នុងសហគមន៍មូលដ្ឋាន និងពង្រឹងអក្ខរកម្មព័ត៌មាននិងប្រព័ន្ធ ផ្សព្វផ្សាយ ជាកត្តាដ៏សំខាន់មួយ ដើម្បីផ្លាស់ប្តូរឥរិយាបទរបស់ពលរដ្ឋដែលជាអ្នកប្រើប្រាស់បណ្តាញទំនាក់ទំនង សង្គម និងប្រព័ន្ធផ្សព្វផ្សាយទំនើប ឱ្យមកចូលរួមទប់ស្កាត់ការរីកសាយភាយនូវព័ត៌មានក្លែងក្លាយ។ ឯកឧត្ដម ម៉ែន សាម៉ន អនុរដ្ឋលេខាធិការក្រសួងព័ត៌មាន ទទួលបន្ទុកមន្ទីរព័ត៌មានខេត្តព្រៃវែង មានប្រសាសន៍ដែរថា គ្រប់ប្រភេទនៃព័ត៌មានក្លែងក្លាយ សុទ្ធតែមានឥទ្ធិពលអវិជ្ជមានមកលើផ្នែកសន្តិសុខ សណ្តាប់ធ្នាប់ សង្គម សេដ្ឋកិច្ច និងនយោបាយ ពោលគឺព័ត៌មានក្លែងក្លាយអាចបង្កអស្ថិរភាព បង្កើតអំពើហិង្សា ដែលបណ្តាល ឱ្យកើតមានអរិភាពសង្គម ប្រជាពលរដ្ឋបាត់ទំនុកចិត្តលើការដឹកនាំ និងនាំឱ្យមានការបែកបាក់សាមគ្គីភាព ក្នុងសង្គម។
ឯកឧត្តម ម៉ែន សាម៉ន អនុរដ្ឋលេខាធិការ បានមានប្រសាសន៍ថា យុទ្ធនាការនៃការប្រឆាំងព័ត៌មានក្លែងក្លាយ ឬនិយាយថាទេ ចំពោះព័ត៌មានក្លែងក្លាយ យើងដឹងរួចមកហើយអំពីព័ត៌មានក្លែងក្លាយដែលមានគ្រោះថ្នាក់បំផុតដល់បុគ្គល សង្គមជាតិ ជាពិសេសគឺរដ្ឋាភិបាល ដែលវាធ្វើឲ្យមានខូចឈ្មោះបុគ្គល ឬស្ថាប័ន ដកការទុកចិត្តពីរដ្ឋាភិបាលនេះ គឺជាព័ត៌មានក្លែងក្លាយ ហើយឯកឧត្តមបានស្នើស្នើសុំអ្នកផ្សព្វផ្សាយតាមបណ្ដាញសង្គមទាំងអស់មានហ្វេសប៊ុក តិកតុក និងអ្នកសារព័ត៌មានទាំងនៅក្នុងប្រទេសកម្ពុជា ឬនៅមូលដ្ឋានខេត្តព្រៃវែងសូមឲ្យផ្សព្វផ្សាយនូវព័ត៌មានណាដែលពិត និងសូមកុំផ្សាយរឿងមិនពិតវាប៉ះពាល់ខ្លាំងណាស់។ ហើយជាពិសេសប្រទេសកំពុងតែមានការប្រឈមរឿងសមរភូមិ ហើយការនិយាយរឿងមិនពិតនេះអាចនាំឲ្យមានការច្របូកច្របល់ក្នុងសង្គមជាតិអស្ថេរភាព ដែលមានបញ្ហាសង្គមជាតិកាន់តែខ្លាំង ហើយឯកឧត្តម សង្កត់ធ្ងន់ថា អ្នកMMO អ្នកមានផេកធំៗ អ្នកមានឥទ្ធិពលលើបណ្ដាញសង្គម ជាបុគ្គលក្ដីសូមមានការប្រុងប្រយ័ត្នចំពោះការផ្សាយរបស់ខ្លួន ហើយសូមឲ្យផ្សាយព័ត៌មានដែលជាក់ស្ដែង ចំពោះប្រភពនាពេលនេះគឺយើងអាចយកមកបាននៅពេលនេះ ប្រភពសំខាន់គឺរបស់រដ្ឋាភិបាល ក្រសួងការពារជាតិ ក្រសួងព័ត៌មានជាដើម ទើបជាប្រភពច្បាស់លាស់។
គោលដៅរបស់យុទ្ធនាការគឺកាត់បន្ថយព័ត៌មានក្លែងក្លាយ ឱ្យមកនៅកម្រិតអប្បបរិមាសំដៅធានាសន្តិសុខព័ត៌មាន៖ គឺការទទួលព័ត៌មានប្រកបដោយគុណភាព និង សុវត្ថិភាពរបស់ប្រជាពលរដ្ឋ។ ឯកឧត្ដម អនុរដ្ឋលេខាធិការ បន្ថែមទៀតថា ក្នុងបរិបទនៃការរីកចម្រើនឥតឈប់ឈរនៃបច្ចេកវិទ្យា ការទទួល និងផ្សព្វផ្សាយព័ត៌មានបែបទំនើប តាមប្រព័ន្ធឌីជីថល ជាពិសេសលើបណ្តាញទំនាក់ទំនងសង្គម បានកើនឡើងជាលំដាប់ ខណៈគ្រោះថ្នាក់នៃ ព័ត៌មានក្លែងក្លាយដែលចរាចរតាមមធ្យោបាយទំនើបទាំងនេះ រឹតតែមានលក្ខណៈស្រួចស្រាល់ឡើង។ ទាំងអស់នេះទាមទារឱ្យ ពលរដ្ឋដែលជាអ្នកប្រើប្រាស់ ផលិត ឬចែកចាយព័ត៌មាន ស្វែងយល់ដឹងឱ្យបានច្បាស់អំពីផល វិបាកនៃព័ត៌មានក្លែងក្លាយ ហើយចេះបង្កើនការប្រុងប្រយ័ត្នក្នុងការប្រើប្រាស់ ប្រកបដោយការទទួលខុសត្រូវ ពិសេសមុនចែកចាយព័ត៌មានណាមួយ ត្រូវផ្ទៀងផ្ទាត់ព័ត៌មានទាំងនោះជាមុនសិន៕
