សៀមបំផ្លាញ​ប្រាសាទ​របស់ខ្មែរ​ ជាសម្បត្ដិ​វប្បធម៌​ដ៏មាន​តម្លៃបំផុត​

(ភ្នំពេញ​) ៖ យោធា​របស់សៀម​បានប្រើអាវុធ​ធ្ងន់ៗ​ជាច្រើន​ រួម​ទាំង​យន្ដហោះ​ទម្លាក់គ្រាប់បែក​ដើម្បី​បំផ្លិចបំផ្លាញ​ប្រាសាទ​របស់ខ្មែរ​ ដែលជាទ្រព្យ​សម្បត្ដិ​ដ៏មានតម្លៃបំផុត​ និង​ក៏ជា​សម្បត្តិ​បេតិកភណ្ឌ​របស់​ពិភពលោក​ផងដែរ​ នេះ​បើយោងតាម ឯកឧត្តម នេត្រ ភក្ដ្រា រដ្ឋមន្ដ្រី​ក្រសួង​ព័ត៌មាន​ បង្ហោះនៅថ្ងៃទី​១១ ខែធ្នូ ឆ្នាំ២០២៥នេះ​។

បើតាមឯកឧត្តម​ នេត្រ ភក្ត្រា យោធាថៃ បានបន្តបាញ់បំផ្លាញប្រាសាទតាក្របីបន្ថែមទៀត នៅក្នុងខេត្តឧត្តរមានជ័យ កាលពីថ្ងៃទី១០ ខែធ្នូ។ រូបភាពដែលឯកឧត្តម​ នេត្រ ភ​ក្ត្រា បានបង្ហោះលើហ្វេសប៊ុកបានបង្ហាញពីទិដ្ឋភាពប្រាសាទតាក្របី រងការបំផ្លិចបំផ្លាញខ្ទេចខ្ទី នៅសល់តែថ្មប្រាសាទគរនៅលើគ្នា ពោលគឺខូចទ្រង់ទ្រាយប្រាសាទទាំងស្រុងតែម្ដង។ 

ក្នុង​នោះ​ ឯកឧត្តម​រដ្ឋមន្រ្តីក្រសួងព័ត៌មាន បានសរសេរលើហ្វេសប៊ុកដូច្នេះ៖ «យើងសូមថ្កោលទោសចំពោះអំពើឈ្លានពានប្រដាប់អាវុធរបស់យោធាថៃមកលើកម្ពុជា និងសូមសហគមន៍អន្តរជាតិចាប់បង្ខំភាគីថៃឱ្យអនុវត្តនូវសេចក្តីថ្លែងការណ៍ស្តីពីកិច្ចព្រមព្រៀងសន្តិភាព ដែលចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ដែលមានឯកឧត្តមប្រធានាធិបតី ដូណាល់ ត្រាំ និងឯកឧត្តមនាយករដ្ឋមន្ត្រី អាន់វ៉ា អ៊ីប្រាហ៊ីម ជាសាក្សី និងបញ្ឈប់ការធ្វើយុទ្ធនាការមួលបង្កាច់កម្ពុជា»។ 

បើ​តាម ឯកឧត្តម នេត្រ ភក្ដ្រា បានសង្កត់ធ្ងន់ថា​ កម្ពុជាជាជនរងគ្រោះនៃសកម្មភាពឈ្លានពានប្រដាប់អាវុធរបស់យោធាថៃ។ ថៃបានបង្កហេតុគ្រប់បែបយ៉ាងដើម្បីមួលបង្កាច់និងចោទប្រកាន់កម្ពុជាដើម្បីរកលេសឈ្លានពានកម្ពុជា៕