(កំពង់ស្ពឺ)៖ ក្នុងកាលៈទេសៈដែលប្រទេសជាតិកំពុងតែមានបញ្ហាសៀមឈ្លានពានទឹកដីកម្ពុជាយើង រាជរដ្ឋាភិបាលដែលកើតចេញពីការបោះឆ្នោតគាំទ្រដល់គណបក្សប្រជាជនកម្ពុជា បានក្លាយជាទីពឹងអាស្រ័យដល់ប្រជាពលរដ្ឋគ្រប់ៗគ្នា ហើយក្នុងនាមជាគណបក្សចាស់ៗវស្សាផងដែរនោះបានយកចិត្តទុកដាក់ដល់ខ្លាំងបំផុត នេះជាការថ្លែងពីសំណាក់ ឯកឧត្តម ហ៊ុន ម៉ានី សមាជិកគណៈអចិន្ដ្រៃយ៍គណៈកម្មាធិការកណ្ដាល និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ ក្នុងពិធីសំណេះសំណាលទទួលសមាជិកថ្មីនាព្រឹកថ្ងៃទី០១ ខែកុម្ភៈ ឆ្នាំ២០២៦ នៅស្នាក់ការបក្សសង្កាត់ព្រះស្រែ ក្រុងឧដុង្គម៉ែជ័យ ខេត្តកំពង់ស្ពឺ។
នាឱកាសនោះផងដែរ លោកប្រធានគណៈកម្មាធិការគណបក្សសង្កាត់ព្រះស្រែបានឡើងអានរបាយការណ៍ជូនអង្គគណៈអធិបតីដើម្បីជម្រាបជូនសមាសភាពសមាជិកចូលថ្មី និងការប្ដេជ្ញាជូនដល់គណបក្ស។ ក្រោយបានស្ដាប់នូវរបាយការណ៍រួចរាល់ ឯកឧត្តម ហ៊ុន ម៉ានី បាននាំយកនូវការសាកសួរសុខទុក្ខ និងសេចក្តីនឹករឭកពីសំណាក់សម្តេចប្រធានគណបក្ស និងសម្តេចអនុប្រធានបក្សជូនក្រុមគ្រួសារគណបក្សប្រជាជនកម្ពុជា សង្កាត់ព្រះស្រែ ដែលមានវត្តមានក្នុងពិធីនេះ។ បន្ថែមពីលើនេះ លោកបានសម្តែងនូវការកោតសរសើរ ចំពោះឆន្ទៈ និងភាពក្លាហានរបស់តំណាងសមាជិក សមាជិកា ដែលបានធ្វើការសម្រេចចិត្តដ៏ត្រឹមត្រូវបំផុត ក្នុងការចូលរួមជីវភាពនយោបាយជាមួយគណបក្សប្រជាជនកម្ពុជា។
ឯកឧត្តម ហ៊ុន ម៉ានី បានបន្តថា គណបក្សប្រជាជនកម្ពុជា មិនល្អឥតខ្ចោះ ប៉ុន្តែជាគណបក្សដែលពឹងពាក់បាន និងនៅរួមសុខរួមទុក្ខជាមួយប្រជាពលរដ្ឋគ្រប់កាលៈទេសៈ។ លោកបានគូសបញ្ជាក់ថា រាជរដ្ឋាភិបាលក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត បានប្ដេជ្ញាចិត្តខ្ពស់ ថែរក្សាសុខសន្តិភាព ស្ថានភាពនយោបាយ និងខិតខំប្រឹងប្រែងអភិវឌ្ឍន៍ប្រទេសជាតិលើគ្រប់វិស័យ ជាពិសេស ការរៀបចំហេដ្ឋារចនាសម្ព័ន្ធ ការស្តារសេដ្ឋកិច្ចជាតិ ដោយនាំមកនូវឱកាសការងារជូនដល់ប្រជាពលរដ្ឋ។ នេះជាទម្លាប់ធ្វើការរបស់គណបក្សប្រជាជនកម្ពុជា ដែលតែងធ្វើតាំងពីថ្ងៃចាប់បដិសន្ធិរហូតមក។
សូមជម្រាបថា ក្នុងចំណោមសមាជិក សមាជិកាបញ្ចូលថ្មី ទាំង៥៨៥នាក់ នៅសង្កាត់ព្រះស្រែ នាឱកាសនេះ រួមមាន កម្មករ កម្មការិនី ចំនួន៣១៨នាក់, សិស្សនិស្សិត ចំនួន២៦នាក់, គ្រូពេទ្យ ចំនួន២នាក់ និងគ្រូបង្រៀន ចំនួន៣នាក់ ក្រោយពីបានពិនិត្យឃើញនូវប្រវត្តិ សមិទ្ធផល និងបេសកកម្មដ៏ឧត្តុង្គឧត្តមរបស់គណបក្សប្រជាជនកម្ពុជាក្នុងការបម្រើជាតិ មាតុភូមិ និងប្រជាជនជារៀងរហូតមក។ នេះជាការលើកឡើងក្នុងពាក្យស្នើសុំចូលជាសមាជិក ដែលបានអានដោយតំណាងសមាជិកសុំចូលថ្មី៕
.jpg)
.jpg)
