ការគ្រប់គ្រងការផ្សាយពាណិជ្ជកម្មគ្រឿងស្រវឹងមិនមែនរារាំងធុរកិច្ចទេ តែជាការកសាងទីផ្សារគួរឱ្យទុកចិត្ត ​

Vannak News Network

(ភ្នំពេញ) ៖ ឯកឧត្តម​ នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងារគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង (គ.គ.ផ.ស.) បានអះអាងថា ការដាក់ចេញនូវវិធានការគ្រប់គ្រងការផ្សាយពាណិជ្ជកម្មគ្រឿងស្រវឹង មិនមែនជាការរារាំងដល់កិច្ចដំណើរការធុរកិច្ចនោះឡើយ ប៉ុន្តែវាគឺជាការកសាងទីផ្សារដែលអាចទុកចិត្តបាន ដោយតម្រូវឱ្យការធ្វើអាជីវកម្មត្រូវមានព្រំដែនច្បាស់លាស់ មានក្រមសីលធម៌ និងការគោរពច្បាប់។



​ការគូសបញ្ជាក់របស់រដ្ឋមន្ដ្រីក្រសួងព័ត៌មាន​ ត្រូវបានធ្វើឡើងក្នុងពិធីបើក «យុទ្ធនាការឆន្ទៈល្អ លើកទី២» ក្រោមប្រធានបទ «បន្តពង្រឹងការអនុវត្តវិធានការចាំបាច់នានាក្នុងការគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង និងភេសជ្ជៈដែលមានជាតិស្ករ ដើម្បីលើកកម្ពស់សុខុមាលភាពប្រជាពលរដ្ឋ» នៅថ្ងៃទី២៨ ខែតុលា ឆ្នាំ២០២៦ នេះ នាសណ្ឋាគារសុខាភ្នំពេញ។


ឯកឧត្តមរដ្ឋមន្ត្រីបានរំលឹកថា រាជរដ្ឋាភិបាលបានបង្កើតក្រុមការងារអន្តរក្រសួងនេះឡើងកាលពីខែមេសា ឆ្នាំ២០២៤ ដែលមានក្រសួងព័ត៌មានជាប្រធាន អមដោយក្រសួងពាណិជ្ជកម្ម ក្រសួងសុខាភិបាល និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជាអនុប្រធាន ព្រមទាំងមានស្ថាប័នពាក់ព័ន្ធជាច្រើនទៀតចូលរួម។ ចំណុចនេះបញ្ជាក់យ៉ាងច្បាស់ថា បញ្ហាការផ្សាយពាណិជ្ជកម្មគ្រឿងស្រវឹងមិនមែនជាបន្ទុករបស់ក្រសួងណាមួយដាច់ាតិលនោះទេ ប៉ុន្តែជាភារកិច្ចអន្តរវិស័យទាមទារកិច្ចសហការរួមគ្នា។


​ឯកឧត្តម​ នេត្រ ភក្ត្រា បានសង្កត់ធ្ងន់លើផលវិបាកសង្គមដែលមិនអាចមើលរំលងបាន ដូចជាគ្រោះថ្នាក់ចរាចរណ៍ក្រោមឥទ្ធិពលគ្រឿងស្រវឹង ការបាត់បង់សុខភាព បញ្ហាគ្រួសារ និងការប៉ះពាល់ដល់ផលិតភាពការងារ ដោយលោកបានលើកឡើងថា៖ «យើងមិនគួរចាត់ទុកបញ្ហាទាំងនេះថាជា "ថ្លៃដើមដែលសង្គមត្រូវទ្រាំ" ដើម្បីឱ្យទីផ្សាររីកចម្រើននោះទេ។ សេដ្ឋកិច្ចរីកចម្រើន និងសុខភាពប្រជាពលរដ្ឋល្អ ត្រូវដើរទៅជាមួយគ្នា»។


រដ្ឋមន្ដ្រីក្រសួងព័ត៌មាន​ បានបន្ថែមថា ការគោរពច្បាប់មិនមែនជាភារកិច្ច ឬបន្ទុករបស់អាជីវកម្មឡើយ ប៉ុន្តែវាគឺជា «តម្លៃប្រកួតប្រជែង»។ ក្រុមហ៊ុនដែលទទួលបានទំនុកចិត្តពី រដ្ឋាភិបាល ដៃគូ និងអតិថិជន គឺជាអង្គភាពអាជីវកម្មដែលអាចឈរជើង និងរីកចម្រើនបានយូរអង្វែង។ ស្រដៀងគ្នានេះដែរ ការផ្សព្វផ្សាយភេសជ្ជៈមានជាតិស្ករ ក៏តម្រូវឱ្យមានការទទួលខុសត្រូវខ្ពស់ តម្លាភាព និងការការពារអ្នកប្រើប្រាស់ផងដែរ ដោយការផ្សាយពាណិជ្ជកម្មត្រូវមានភាពទាក់ទាញដោយមិនបំផ្លើស និងប្រកួតប្រជែងដោយសុចរិត។

​

ជាចុងក្រោយ ឯកឧត្តម​ នេត្រ ភក្ត្រា បានគូសបញ្ជាក់ថា យុទ្ធនាការ «ឆន្ទៈល្អ លើកទី២» នេះ គឺការបោះជំហានពី «ដំណាក់កាលនៃការស្វែងយល់» ទៅកាន់ «ដំណាក់កាលនៃការទទួលខុសត្រូវ និងការវាស់វែងលទ្ធផលជាក់ស្តែង» ដើម្បីធានាថា រាល់គោលការណ៍ច្បាប់ដែលបានយល់ដឹង នឹងត្រូវយកទៅអនុវត្តយ៉ាងមានប្រសិទ្ធភាព៕


#buttons=(យល់ព្រម, ទទួលយក!) #days=(20)

គេហទំព័ររបស់យើងប្រើCookies ដើម្បីបង្កើនបទពិសោធន៍របស់អ្នក ស្វែងយល់បន្ថែម
Accept !
To Top